Туннэ удмурт Йӧскалык театрын «Чеберай» ӵошатскон ортчиз. Радъяз та ужрадэз «Дэмен» огазеяськон. Вожвылъяськонэ 10 нылаш пыриськиз. Ваньзы ик соос удмурт сям-йылол возьматӥзы, кескич юанъёслы валэктон утчазы, кырӟазы, эктӥзы но купальникен потазы. «Дыдыкай» ним (3-тӥ инты) басьтӥз Дэри ёросысь Дарья Байкова, «Мусокай» (2-тӥ инты) луиз Шаркан ёросысь Лариса Иванова, нош вормиз но «Чеберай» ним утӥз Татарстанысь Кукмор ёросысь Олеся Полатова.
— Олеся, валлян арын тон «Чеберай» вожвылъяськонэ пыриськид ни вал, соку куинетӥ интые кылид но «Дыдыкай» ним басьтӥд. Малы нош ик та ӵошатсконэ пыриськемед потӥз?
— Мон тодӥсько вал, мыным вормон кулэ шуыса. Тодӥсько вал, вормо шуыса. Нырысь тулкымъяськи ке но, сцена вылэ потэм бере, ваньмыз со тӧлӟиз.
— Кыӵе конкурслэсь тон тужгес но кышкад?
— Кылем арын визьме сынакузы, юазы, ку удмурт йӧскалык театр пуктэмын. Соку мон мар вераны ӧй тоды. Али нош коть изьыкум мед сайкатозы но юалозы, верало: со пуктэмын 1931-тӥ арын. Та выллем юанъёслэсь ик туэ но кышкай. Валасько ук, ӵошатсконэз радъясьёс вормисе чебер вылтусозэ гинэ ӧвӧл, визьмозэ но ассэ йӧно возисьсэ быръёзы шуыса. Азьланяз Чеберай финн-угор “Уйпал кизили” вожвылъяськонын Удмурт Элькунэз возьытэ медаз уськыты.
— Нош кызьы дасяськид? Вормон понна вырид бере, трос дырыд дасяськонлы быриз, дыр?
— Удмурт кун университетын, удмурт филологи факультетын дышетскисько бере, трос лыдӟиськоно но гожъяськоно луисько. Вал сыӵе дыръёс, куке дышетсконме репетициос йырин кельтылоно луи. Кышкай, тазьы дышетсконам но шуг-секытъёс кылдозы шуыса. Но ваньмыз умой кадь. Ваньзэ вуи.
Тау карем потэ Кукмор ёросысь РДК-лэн директорезлы Гареева Гульнар Закирзяновналы, школаысь дышетӥселы Гайнанова Расима Кавиевналы, удмурт калык «Инвожо» ансамбльлы но вань эшъёсылы, ӵыжы-выжыосылы, кинъёс мыным юрттӥзы, оскизы, дасязы. Мынам вормонэ – соослэн вормонзы.
— Сям-йылолэз возьматыкуды, сокем зол эктӥд, пыд улысьтыд ӟус но кырыжаз, собере воксё но тӥяськиз. Ӧд куалеты-а?
— Номыр но ӧй куалекты. Сыӵе задорен эктӥ, ӟуслэсь тӥяськемзэ но валатэк кыли кадь.
— Тросэз нылашъёс выль удмурт стилизованной дэремъёсын потазы. Кинлы ке со яра, нош кин ке талы пумит луэ. Выльёсаз вашкала удмурт дэремлэн нокыӵе шӧмыз уг кыльы, пе. Тон кызьы та шоры учкиськод?
— Мон малпамъя, вашкала дэремлэсь покройзэ но пужыоссэ чакласа, выль дэрем вурид ке, со умой гинэ. Озьы история уз быры. Мон но аслам вурем дэременым туннэ эктӥ-кырӟай
Нылъёслэн но ваньзылэн туж аспӧртэмлыко дэремъёссы вал, но мыным ваньзылэн кельшиз шуыса, вераны уг быгатӥськы.
— Олеся, Ижкаре дышетскыны вуэмед бере ик, тон удмуртъёс пӧлы зымид. Fashion клубын удмурт патиосты но нуиськод, пӧртэм ужрадъёсы но пыриськиськод. Кыӵегес тыныд Удмурт Элькунысь удмурт егитъёс йӧто?
— Удмуртъёслэн асьсэлэн движухазы кылдэмын, со туж чаляк азьланьтӥське. Но со движуха улонмылэн ог люкетэз мед луоз шуыса, мыным потэ, егитъёслы дырзэс ӧвӧл жаляно. Мед ӵемгес но тросгес пыриськозы пӧртэм ужрадъёсы, кудъёсыз сӥземын удмурт лулчеберетэз азьланьтонлы.
— Кызьы малпаськод, маин тон тужгес но висъяськид мукет нылъёслэсь? Маин жюриез синмаськытӥд?
— Быдэс вожвылъяськон ӵоже мынам мылкыды туж капчи вал, мон трос мыняй, сценалэсь ӧй кышка. Кызьы мон шӧдӥ, со ик кельшиз учкисьёслы но жюрилы. Нош мыным кельшиз соослы быгатонлыкъёсме возьматыны.
— Капчи мылкыдыд но номырлэсь кышкамтэед зэм но туж адӟиськиз, шӧдӥськиз. Мукет нылъёс куалекъязы но, возьдаськизы но. Шуо ук, удмуртъёс котьку возьдасько, малэсь ке кышкало. Нош бигер нылъёс оп! шуытозь ваньзэ лэсьто. Кызьы малпаськод, сыӵе етӥз луэмед бигеръёс пӧлын улэменыд сэрен ӧвӧл-а?
— Мон малпасько, удмуртъёс возьдаськисесь шуыса веран – со шузи малпан. Огез озьы шуиз, нош мукетъёсыз сьӧраз вераса кыллё. Мон асме чылкак удмурт нылашен лыдъясько, нош возьдаськонэ нокытӥям но ӧвӧл.
— Нош вормемдэ верамзы бере, азьпалысьтым нылаш шуиз: ачиз Татарстанысь, нош удмурт нылашъёсты лэсьтӥз. Ма та сярысь шуод?
— Валаськод-а, мон Татарстанысь ке но, мон удмурт нылаш. Соин ик номырлы паймыны. Мон вордӥськи но дышетски удмурт гуртын, анай кылы мынам – удмурт кылы. Соин ик вераме потэ на, вордӥськем шаере мынам – Татарстан, нош бигер кылэз отын дышетоно луи, малы ке шуоно со – кун кыл, сое милемыз одно дышетыны косо.
Таӵе верамъёсты кылэм бере кӧт ӝож. Мон янгыш ӧвӧл ук, Татарстанын вордски шуыса…
— Кӧтыд ӝож медаз луы. Тон туннэ Чеберай луид, шумпотоно но данъяськоно таин!
— Мон – удмурт, соин данъяськисько.
"Инвожо" 