Италмас но, лызгырлы но
Пиштӥзы турын пӧлын
Мар понна меда тужгес но
Синмаськи инвожолы?
Инвожо… Мар шуод, чебер кыл. Сое вераськод ке, син азе соку ик пуксе удмурт шаерлэн тусыз: пӧртэм сяськаосын пужыятэм возьёс, тылобурдо куараосын тырмем арамаос, воринъяськыса кошкись шуръёс, ӵуж буртчин кадь тулкымъяськись ю бусыос, шундыё нуналъёс но толэзё уйёс…
Чеберезлы луыса ик, инвожо кылын нимаз, луоз, Татарсатнысь Кукмор ёросысь Сутер-Починка школаысь Валентина Николаевна Михайлова ансамбльзэ. Бен, Инвожо – чебер сяська ним, со – гужемлэн самой чебер но шулдыр толэзез…
Ансамбльлы тырмиз ни 10 ар.
Ортчем сюрессэ ке верано – пичи ӧвӧл: Кукмор ёросысь вань удмурт гуртъёс, Мари Эл, Мамадыш, Казань… Кытчы гинэ ӧз вуылэ, ваньмыз шуныт, капчи мылкыдын пумиталлязы.Кӧня дипломъёссы, грамотаоссы но кузьымъёссы! Ваньзэ вераса уд быдты.
«Инвожо» ансамбльлэн репертуарез но паськыт: удмурт калык кырӟанъёс, такмакъёс, эктонъёс, шудонъёс. Вордскем шаерез, ас калыктэ гажан, яратон, матысь эшъёс сярысь кырӟанъёс – ваньзэ шулдыр гурен кисьтэ «Инвожо». Берло дыре калык сямъёсты (ныл лушканэз, сюанэз, солдатэ келянэз…) но возьматон бадӟым инты басьтэ.
Ваньмыз чебер, усто адске тыршемен гинэ. Та ансамбльын кӧня ар ужало ни дышетӥсьёс-кузпалъёс Валентина Михайлова но Геннадий Ахметов. Ӵукнаысен ӝытозь дырзэс школаын ортчыто. Пиналъёс юртто соослы. Нырысь-валысь баянистсы ӧй вал. Нош кивалтисьёс утчало, ветло. Тыршеменызы ик шедьтӥзы баянистэз Раиф Абрахмановез. Али тани нош пичиосын «Чингыли» вокальной группа кылдытӥзы.
Ог-огзылэсь пӧртэм быгатэмзэс возьмато Кукмор районысь «Гигант» колхозысь егитъёс. Вуж Канисарысь начальной школаязы но дышетскисьёсын «Чалма» ансамбль усьтэмын. Кивалтэ Валентина Михайловалэн выныз – Леонид Михайлов.
… Ансамбльлы 10 ар тырмемлы сӥзьыса, туж бадзым праздник вал. Кытысь гинэ ӧз вуылэ куное: ёросысь, элькунысь, «Между Волгой и Уралом» передачаосты дасясь репортёръёс. Школаез йылпумъямъёс отчы но татчы пазяськизы ни, но соос уг вунэто ансамбле ветлэмзэс, дышетӥсьёссэс. Бертыны оз быгатэ армиын служить карись пиос гинэ. Жаль. Но арысь аре будо пичиос, мылысь-кыдысь, ветло ансамбле, тунсыкъясько вордскем шаеренызы, ярато анай кылзэс. Татарстанын удмурт гуртъёс трос ӧвӧл, нош удмурт школаосын гажало удмурт кылэз, кылдытыло удмурт фольклор ансамбльёс. Тани Сутэр-Починка школа. Котькытчы вутско соос, быгато, тыршо. Кӧня ар чоже ни шулдыртэ ни «Инвожо» ансамбльзы. Асьмелэн калыкын веран вань «Инвожо уйшоре пиштэ шудоослы гинэ». Ойдо бен, олокӧня аръёс ( аръёс гинэ ӧвӧл, дауръёс ӵоже!) мед пиштоз «Инвожоды». Азинсконъёс но паськыт сюрес тӥледлы!
Роза Иванова
УдГУ-ысь студентка
"Инвожо" 